ԿԱՅԱՑԱՎ COMPIIT ԾՐԱԳՐԻ ԱՇԽԱՏԱՆՔԱՅԻՆ ԽՄԲԻ ՀԱՆԴԻՊՈՒՄԸ ԴՈՐՏՄՈՒՆԴԻ ԿԻՐԱՌԱԿԱՆ ԳԻՏՈՒԹՅՈՒՆՆԵՐԻ և ԱՐՎԵՍՏԻ ՀԱՄԱԼՍԱՐԱՆՈՒՄ
Ս.թ. մարտի 15-18-ը Էրազմուս+CompIIT (Կարողունակություններ՝ միջազգային նորարարական նախագծերի համար) ծրագրի շրջանակում Գերմանիայի Դաշնության Դորտմունդի կիրառական գիտությունների և արվեստի համալսարանում կայացավ ծրագրի աշխատանքային խմբի հանդիպումը, որին ԳՊՀ-ից մասնակցեցին ռեկտոր Տիգրան Վանդունցը, ԱԿՀԼ բաժնի վարիչ Նաիրա Սաֆարյանը և Շարունակական կրթության և կարիերայի զարգացման բաժնի վարիչ Արփինե Դինունցը:
Մարտի 16-ին տեղի ունեցած կոնսորցիումի հանդիպմանը ողջույնի ելույթներով հանդես եկան Գերմանիայի Դաշնության Դորտմունդի կիրառական գիտությունների և արվեստի համալսարանի դոկտոր Կարստեն Վոլֆը, Բելգիայի Լյուվենի կաթոլիկ համալսարանի դոկտոր Պիտեր Արասը, Հայաստանի Եվրոպական համալսարանի ծրագրի համակարգող Գոհար Ավետիսյանը, ԳՊՀ-ի ԱԿՀԼ բաժնի վարիչ Նաիրա Սաֆարյանը և Երևանի կապի միջոցների գիտահետազոտական ինստիտուտի տնօրեն Մհեր Մարկոսյանը:
Օրակարգը հագեցած էր ծրագրի աշխատանքային փաթեթների իրականացման ընթացքի և հետագա գործողությունների վերաբերյալ հետևյալ քննարկումներով.
- ԱՓ1-Կառավարում և ԱՓ2-Նախապատրաստում և հստակեցում: Փորձնական փուլի արդյունավետության գնահատում և վերանայում:
- Վիրտուալ նախագծի և ProCom լեզվի և հաղորդակցման դպրոցի իրականացում և հետագա քայլերի նախանշում:
- Որակի ապահովման պլանի ստեղծում և մշտադիտարկման գործողությունների նախանշում:
- Ծրագրի պաշտոնական կայքի գործարկման արդյունավետության գնահատում:
Դորտմունդի կիրառական գիտությունների և արվեստի համալսարանում հայկական կողմի գործընկերները ծանոթացան նաև բուհի պատմությանը, զարգացման փուլերին, արդի հնարավորություններին, հետազոտական լաբորատորիաներին և այլն: