ՀԱՅԱԳԻՏԱԿԱՆ ՄԻՋԱԶԳԱՅԻՆ ԳԻՏԱԺՈՂՈՎ ՍԱՆԿՏ ՊԵՏԵՐԲՈՒՐԳՈՒՄ՝ ՆՎԻՐՎԱԾ ՂԵՎՈՆԴ ԱԼԻՇԱՆԻ ԵՎ ՄԿՐՏԻՉ ԽՐԻՄՅԱՆԻ ՀՈԲԵԼՅԱՆՆԵՐԻՆ

Ապրիլի 27-28-ը Սանկտ Պետերբուրգի պետական համալսարանում տեղի ունեցավ հայագիտական միջազգային 4-րդ գիտաժողովը, որը նվիրված էր Ամենայն Հայոց կաթողիկոս Մկրտիչ Խրիմյանի և Մխիթարյան Միաբանության անդամ, ականավոր բանաստեղծ ու հայագետ Ղևոնդ Ալիշանի ծննդյան 200-ամյակներին:
Գիտաժողովի կազմակերպիչն էր Սանկտ Պետերբուրգի պետական համալսարանի Արևելյան ֆակուլտետը, համակազմակերպիչները՝ ՌԴ Գիտությունների ակադեմիայի Արևելյան ձեռագրերի ինսիտուտը, Վենետիկի Մխիթարյան միաբանությունը, ՀՀ ԳԱԱ Հայագիտության և հասարակական գիտությունների բաժանմունքը, Մեսրոպ Մաշտոցի անվան հին ձեռագրերի գիտահետազոտական ինստիտուտը, Երևանի պետական համալսարանը:
Գիտաժողովին առցանց ձևաչափով մասնակցում էին մոտ հինգ տասնյակ գիտնականներ, ոլորտի մասնագետներ ՀՀ-ի և ՌԴ-ի 20-ից ավելի գիտակրթական կազմակերպություններից: Գիտաժողովի լեզուներն էին ռուսերենը, հայերենը, անգլերենը և ֆրանսերենը:
Լիագումար նիստին բացման խոսքով հանդես եկավ գիտաժողովի կազմակերպիչ, համանախագահ, Սանկտ Պետերբուրգի պետական ​​համալսարանի ավագ դասախոս, ՌԴ Գիտությունների ակադեմիայի Արևելյան ձեռագրերի ինստիտուտի գիտաշխատող, բանասիրական գիտությունների թեկնածու Դոնարա Մկրտչյանը՝ ողջունելով և շնորհակալություն հայտնելով գիտաժողովի  կազմակերպիչներին, մասնակիցներին և արդյունավետ աշխատանք մաղթելով նրանց:
Ողջույնի խոսքով հանդես եկան գիտաժողովի նախագահ, պատմական գիտությունների դոկտոր, պրոֆեսոր, Ռուսաստանի գիտությունների ակադեմիայի ակադեմիկոս, Էրմիտաժի գլխավոր տնօրեն, Սանկտ Պետերբուրգի պետական ​​համալսարանի Արևելյան ֆակուլտետի դեկան Միխայիլ Պիատրովսկին, Ռուսաստանում Պատրիարքական էկզարխ, Հայ Առաքելական եկեղեցու Ռուսաստանի և Նոր Նախիջևանի թեմի առաջնորդ Եզրաս արքեպիսկոպոս Ներսիսյանը, Ռուսաստանի Գիտությունների ակադեմիայի թղթակից անդամ, Ռուսաստանի ԳԱ Արևելյան ձեռագրերի ինստիտուտի տնօրեն, պատմական գիտությունների դոկտոր Իրինա Պոպովան, Սանկտ Պետերբուրգի պետական ​​համալսարանի պատվավոր պրոֆեսոր, Մերձավոր Արևելքի պատմության ամբիոնի վարիչ, պատմական գիտությունների դոկտոր Նիկոլայ Դյակովը, ՀՀ ԳԱԱ ակադեմիկոս, ՀՀ ԳԱԱ հայագիտություն և հասարակական գիտությունների բաժանմունքի ակադեմիկոս-քարտուղար Յուրի Սուվարյանը, ՀՀ ԳԱԱ Մ.Աբեղյանի անվան գրականության ինստիտուտի տնօրեն, բանասիրական գիտությունների դոկտոր Վարդան Դևրիկյանը, Մխիթարյան միաբանության անդամ Հայր Վահան Օհանյանը, ՌԴ-ի «Ռուսական աշխարհ» հիմնադրամի Սանկտ Պետերբուրգի մասնաճյուղի տնօրեն, Ռուսաստանի Ա.Գերցենի անվան պետական մանկավարժական համալսարանում Յունեսկոյի «Կրթությունը բազմամշակութային հասարակությունում» ամբիոնի դոցենտ Օլեգ Մուկովսկին և ուրիշներ:
Գիտաժողովի աշխատանքներին մասնակցում էր նաև Գորիսի պետական համալսարանի պրոռեկտոր, բանասիրական գիտությունների թեկնածու, դոցենտ Թեհմինա Մարությանը, ով հանդես եկավ «Ղևոնդ Ալիշանը Հակոբ Օշականի գնահատմամբ» թեմայով զեկուցմամբ:
Երկօրյա գիտաժողովի ընթացքում հնչած զեկուցումները հատկանշվում էին արդիականությամբ,  գիտական նորույթներով և ընդհանուր առմամբ ապահովում էին հայ ականավոր հոգևոր ու մշակութային գործիչների հանրագիտակ վաստակի լուսաբանման համակողմանիությունը, վերահաստատում նրանց գործունեության գրապատմական բացառիկ դերն ու նշանակությունը:
Գիտաժողովի հոդվածների ժողովածուն մինչև տարեվերջ տպագրելու է Սանկտ Պետերբուրգի պետական համալսարանը՝ ռուսերեն, միջազգային բարձր վարկանիշ ունեցող հրատարակությամբ (ինդեքս. РИНЦ-Российский индекс научного цитирования):
Գիտաժողովի ծրագիրը՝ տե՛ս այստեղ: Программа